බොරළු කැට
තණ පඳුරු
මල් පියළි
මල් රේණු
හැම එකක් පෙනෙන සේ
දිවා කල මෙන් ම රෑ
පරිසරය සතපවා
සිසිලසින්,
ගත පුරා
සිත පුරා
සැනසිල්ල උතුරුවා,
වෙල් එළියෙ
බඩවැටියෙ
දිය කඳුරු මත වැදී
මඳ පවන් හමද්දී,
නොපෙනුනත් කොහේදැයි
බකුසු හඬ ඇසෙද්දී,
පායලා
පොසොන් සඳ.
රොද බැඳුණු
සුදෝ සුදු වළාකුළු
පුළුන් කැටි තුළට වී
හිනැහෙන්න පුන්සඳේ,
සැඟ නොවී මඳක් හෝ වෙලාවක්
වළාකුළු තුළ වැදී
හිනැහෙන්න පුන්සඳේ.
නිල් අහස පුරාවට
තරු දරුවො
රඟද්දී ඔබ වටේ,
ඔබ කැළුම්
තව තවත්
දෙරණ මත විහිදුවා
රාත්රිය පුරාවට
හිනැහෙන්න පුන්සඳේ.
Subscribe to:
Post Comments (Atom)
No comments:
Post a Comment