දවාලට පායපන් පුන් සඳේ

බෝ මළුවෙ දුව යන්න
කොළ අස්සේ සැඟවෙන්න
එකක් නොව
තව එකක්
වතුර කල නාවන්න
වැලි මළුව පුරාවට
නෙක රූප අඳින්නට,
දවාගෙන දෙඅත් පොඩි
මැටි පහන් දල්වන්න,සුවඳ කූරක් දෙකක්

නොව අත්මිටක් තරමෙ ගෙන

වැලි ගොඩේ ඉන්ඳන්න,

'දස මාසේ උරේ කත්වා - පෝසේති  උදධිඛාරනං

ආයු දීගන් වස්ස සතන් - පිතු පාදන් නමා මහo'

එරමිණියා ගොතාගෙන

සුදු කඩියා ඉන්දාගෙන

අහන්නට,

හුරතලය අහන්නට,

හුරතලය දකින්නට,

හිනහෙනා සුදු මුහුණ

විඳින්නට

කිරි සුවඳ,

සුදු වෙහෙර - බුදු මුහුණ - පඩු සිවුරු,

අපේ රට - අපේ දැය

ඒ කතා -  මේ කතා

ඔබ හිතේ රන්ඳන්න,

පායාපන් පුන් සඳේ

දවාලට පායපන්,

දස කැළුම් විහිදුවා

දවාලට පායපන්,

ඉරිදාක දවාලට

පායපන් පුන් සඳේ.

සුමුදු පහස ලැබුවා

සුමුදු පහස ලැබුවා
සුමුදු පහස ලැබුවා
සුසිනිදු අතැගිලි
එකිනෙක පටලා
සුමුදු පහස ලැබුවා.
දයාව කරුණා

වෑහෙන දෑසින්

මවක් තුරුල්ලේ

බිළිදෙකු ලබනා

උණුසුම

සෙනෙහස ලැබුවා

සුමුදු පහස ලැබුවා.

රැළි හිසකේ පිස

හමනා මදනල

සුවද උරා බිව්වා

සුමුදු පහස ලැබුවා.

නිමේශයක්වුව

අතැගිලි පටලා

සුමුදු පහස ලැබුවා.

උණුහුම

ඇස් ගුළි
රිදෙනවා.
හුරතලය
මහා බරට
රූප අඳිනවා
හදවතේ

මතක සිත

නෙත'ග
කදුළු.
හුරතලේට
හිනාවෙන
පරිගණක තිරය.

ළඟක නැත

දෙඇස් ඇත
දසුන් නැත
දෙකන් ඇත
ඇසෙන් නැත
සිතක් ඇත
සිතුම් නැත
පුතෙක් ඇත
ළඟක නැත

අභාග්‍යය

අසාවෙන්
ඈත් කළා
තිසරපට,
තියාගෙන
දහසක් දේ
හිත
ඇතුළේ.
ගඟට කැපූ ඉණි වගේ!
තණ අග පිනි වගේ!!
හිතු හිතූ දේ
සුන්වුණා.
බැංකුවක්,
පුංචිම
පුංචි බැංකුවක්,
ඒක ඇතුළේ.

පැතුම

සතියකට
වරක් හෝ
ඇවිදින්,
හාවක් හූවක්‌ නැතිව
මහා බර කල්පනාවක්
ආරූඩ කරගෙන,
සුරතල් ඇඟිලි තුඩින්
නොයෙක් රූප
අඳිනා තෙක්
බලාන ඉන්නවා,
පින්සල්
දිය සායම්
හා
කඩදාසි,
ඉස්තෝප්පුවේ
මේසය උඩ

බුදු වේවා

දහසක්
බුදුවරු
බුදුවන
මේ උදෑසනේ
බුදු වේවා
මා සුදු දුව
මා හිත තුළ.
යහපත මේ
නරකය මේ
දැනගෙන,
බුදු වේවා
මා සුදු දුව
මා හිත තුළ.
අදද
හෙටද
සංසාරේ
දකින තුරා
නිවනේ
සිරි අසිරිය,
බුදු වේවා
මා සුදු දුව
මා හිත තුළ.

වෙසක් ඇවිල්ලා

අහස පොළව
නිසංසලේ
අවුරුද්දේ
කිසිම දිනක
නොදැනෙනා
මහ අමුතු සිරිය.
බුද්ධාලම්භන ප්‍රීතිය?
මළානික
පහන් තිර කොඳුරනා
දිග කථාව.
දිග කථාවක නිමාව
කියා දෙන වෙසක් දින.
දස දහසක්
පහන් එළිය.
එළි තිතකුදු නැති හදවත.
ඒත්,
මුමුණනා නියාම
වෙසක්

වෙසක්

සුභ වෙසඟක්

සැමටම

ප්‍රීති වෙසක්.

මා පුතු

පුත ඔබ මගේ මා පුත ඔබ නෙතු මාගේ
නෙත ඔබ මගේ මා නෙත ඔබ පුත මාගේ
සිත ඔබ මගේ මා සිත නිති පුත මාගේ
නෙත පුතු මගේ මා නෙත නිති පුත මාගේ

මිතුරෝ

සැබෑවටම
එක් දිනකින්
මෝදුවන නව දල්ල
මට ඉගිකරයි.
අද දවසේ දකුණට හැරවුනු අතු
හෙට දවසේ
වමට හැරෙන බව
මට නිසැකය.
ගහ මුදුනේ
එක් පැත්තක්
ඵලෙන් බර වුවත්
අනෙක් පැත්ත
එසේ නොවන්නේ මන්දැයි
මට දැනේ.
මා අවට ඇති
ගහකොළ
මා
උමතු කරයි,
කාලය ගෙවෙනවා
නොදැනෙනා තරමට
මා උමතු කරයි

විශ්වයේ රහස

මේ මහා විශ්වයේ
අංශුවක්,
අංශු මාත්‍රයක්
ඔබ.
සැහැල්ලු දිවියේ
රහස
දැනගැන්ම එය.
රාත්‍රී අහස දෙස බලන්න
තරු අතරේ අතරමං වෙන්න
ජීවත්වීමේ අරුත
ජීවත්වීමේ රහස
එහි ලියවී ඇත,
එය දැනගන්න.
අනේක තරු දිලෙනා
මන්දාකිනියේ
අතරමං වෙන්න.
වැටහී යනු ඇත
කොතරම් ඔබ
කුඩාද යනවග.
ගෙවාදමූ කාලය
ගවා දැමූ බව.
ඉතිරිව ඇති කාලය
කොතරම් කුඩාද යන වග,
වැටහෙනු ඇත.
ගහට කොළට
ආදරය කිරීමට
සැහැල්ලුවෙන් ඉදීමට
ඔබට සිතෙනු ඇත,
එය ඔබ
ඉගෙනගනු ඇත.
අත්දුටුවයි.
ප්‍රත්‍යක්ෂයි

මරණ තුන

අතෙකින් විභාගය
අතෙකින් රස්සාව
අතෙකින් විවාහය
මරණ තුනක් ඇති මිනිහෙක් පැණි කෑහ.